कोरियामा मृत्यु भएकाको परिवारलाई ११ लाख सहयोग

असार ३०, २०७४ दक्षिण कोरियामा मृत्यु भएका विराटनगर ३ का उमेशचन्द्र पौडेलको परिवारलाई डेउ नेपाली एकता समाज गजेदो, दक्षिण कोरियाले ११ लाख ६४ हजार ३ सय ८४ रुपैयाा सहयोग गरेको छ । समाजका सचिव चन्द्र सम्बाहाम्फेले पौडेलकी ६ बर्षीया छोरी युनिशाको अध्ययनका लागि भन्दै सो रकम हस्तान्तरण गरेको हो । यादव चन्द्र पौडेलको संरक्षणमा युनिशाको नाममा विराटनगरस्थित नेपाल बैंक लिमिटेडमा मुद्दती खाता खोलेर रकम जम्मा गरिएको समाजले जनाएको छ । समाजका सचिव सम्बाहाम्फेले आज पत्रकार सम्मेलन गरी रकम जम्मा गरेको भौचर मृतक पौडेलकी पत्नी सुष्मा बिष्टलाई हस्तान्तरण गर्नुभएको हो । सचिव सम्बाहाम्फेले संगै काम गर्ने साथी उमेश चन्द्रकी नावालिक छोरीको अध्ययनका लागि भन्दै डेउ कम्पनीमा कार्यरत ५ सय ७२ जनाले स्वइच्छाले सो रकम संकलन गरेको बताउनुभयो । युनिशा बालिग भएपछि मात्रै सो रकम चलाउन पाउनेछन् । रोजगारीका लागि दक्षिण कोरिया पुगेका पौडेलको गत मे ५ मा हृदयघातका कारण मृत्यु भएको थियो ।