पहाडी क्षेत्रमा पनि सर्पदंशका बिरामीको संख्या बढ्दै

असार ३०, २०७४   जलवायु परिवर्तनसँगै काठमाडौं उपत्यकासहित पहाडी जिल्लामा पनि सर्पदंशका बिरामीको संख्या बढ्न थालेको छ । पछिल्लो समय बिषालु सर्प पहाडी जिल्लामा पनि पाईन थालेपछि सर्पदंशका बिरामीको संख्यामा वृद्धि हुन थालेको चिकित्सकहरु बताउँछन् ।  राजधानीको टेकुस्थित शुक्रराज ट्रपिकल तथा सरुवा रोग अस्पतालमा सर्पदंशको उपचार गराउनेको बिरामी दैनिकजसो आउने गरेका छन् । काठमाडौं उपत्यकाका तीनै जिल्ला सहित धादिङ, नुवाकोट, काभ्रे, सिन्धुपाल्चोकबाट बिरामी उपचारका लागि आउने गरेको अस्पतालकी मेडिकल रेकर्ड अधिकृत सुधा ठाकुरले बताउनुभयो ।  २०७२ सालको भुकम्पले जमिन फाटेका स्थानमा बर्षायाम सुरु भएसँगै सर्पको बिगबिगी सुरु हुने स्थानीय बताउँछन् । यो बर्षको पहिलो तीन महिनामा मात्र ८९ जनाले सर्पदंशको उपचार गराएको शुक्रराज ट्रपिकल अस्पतालले जनाएको छ । वैशाखमा ५ जनामात्र उपचारका लागि अस्पताल पुगेपनि जेठमा २८ र असारको २९ गतेसम्म ५६ जना सर्पदंशका बिरामीले उपचार गराएको ठाकुरले बताउनुभयो । सर्पदंशका बिरामी वर्षेनी बढ्दै गइरहेको अस्पतालको तथ्याङ्कले देखाउछ । यता, जिल्ला जनस्वास्थ्य कार्यालय काठमाण्डौका प्रमुख मोहनप्रसाद श्रेष्ठले भने काठमाण्डौमा सर्पदंशको खासै समस्या नभएको दावी गर्नुभयो ।