क्व्होलासोंथरको बजेट पौने २५ करोड

असार ३०, २०७४- स्थानीय तहपछिको पहिलो गाउँसभाले क्व्होलासोंथर गाउँपालिकाको आगामी आर्थिक बर्ष २०७४/०७५ का लागि २४ करोड ७२ लाख ५४ हजार रुपैयाँ बजेट विनियोजन गरेको छ ।

गाउँपालिका अध्यक्ष प्रेमबहादुर घलेका अनुसार चालुतर्फ ३ करोड ६४ लाख ८७ हजार, पूँजिगततर्फ ९ करोड ५४ लाख ३७ हजार र सामाजिक सुरक्षाभत्ता ३ करोड २८ लाख २० हजार र सशर्त अनुदानतर्फ ८ करोड २५ लाख १० हजार रहेको छ । बजेटमा बित्तिय समानीकरण अनुदानतर्फ ११ करोड ७३ लाख ५५ हजार, प्रदेश सरकार अनुदान १५ लाख, आन्तरिक आय ५७ लाख ६९ हजार र चन्दादानबाट २५ लाख रुपैयाँ विनियोजन गरिएको छ ।
घलेगाउँमा शुक्रबार आयोजित गाउँ सभामा उपाध्यक्ष कुमारीमुनी गुरुङले नीति तथा कार्यक्रम प्रस्तुत गरेकी थिइन् । सभाले गाउँसभाले विपन्नलाई आत्मनिर्भर बनाउन कृषि र पशुमा आधारित ‘एक घर, एक ब्यवसाय’, ‘गाउँगाउँमा सहकारी, घरघरमा रोजगारी’ लगायतको नीतिलाई अवलम्बन गर्ने नीति पारित गरेको छ । क्व्होलासोंथरको अर्थतन्त्र सवलीकरण: कृषिको आधुनिकीकरण’  नीतिलाई अवलम्बन गरिने भएको छ । ‘क्व्होलासोंथरको संस्कृति र प्रकृति: पर्यटन उद्योगमार्फत आर्थिक समृद्धि’ नीतिलाई अवलम्बन गरिने भएको छ ।

यस्तै, ‘एक घर, एक स्वास्थ्य विमा कार्यक्रम’ अवलम्बन गर्ने, गरिब नागरिकलाई ५० प्रतिशत विमा रकम स्थानीय सरकारले ब्यहोर्ने, ५ बर्षमा गाउँपालिकालाई कुपोषण रहित बनाउन पहल साथै गर्भवती र सुत्केरीलाई सवै सेवा नि:शुल्क दिने नीति पारित गरेको छ । २५ शैय्याको अस्पतालका लागि पहल गरिने भएको छ । सुर्तिजन्य र मदिरा उत्पादनको विक्रीवितरणमा कडाइ गरिने भएको छ । गुरुङ जातिको आदिमथलो क्व्होलासोंथरको संरक्षण, संवद्र्धन र प्रचारप्रसारमा जोड दिइने भएको कार्यकारी अधिकृत दीपेन्द्र दाहालले बताए । उनका अनुसार हरेक वडा कार्यालयमा इन्टरनेट जडान गरिने र सेवाग्राहीलाई टोकन प्रणाली लागू गरिने भएको छ ।

कर्मचारीलाई दण्ड र पुरस्कार साथै उत्कृष्ट कार्य गर्ने कर्मचारी, जनप्रतिनिधि, सवैभन्दा बढी कर तिर्ने करदाता, राम्रो काम गर्ने उपभोक्तालाई पुरस्कृत गरिने नीति अघि सारिएको छ । यस्तै, महिला र पुरुषबीच समान कामको समान ज्यालाको ब्यवस्था लागू गरिने भएको छ । बैदेसिक रोजगारमा जानेका लागि तालिम प्रवन्ध गर्न सम्बन्धित निकायसंग समन्वय गरिने साथै बैदेशिक रोजगारीमा जानेको लगत राखिने र विदेशमा सिकेको सीपमलाई प्रमाणिकरण गरिने नीति अघि सारिएको छ । गाउँपालिकाले एफएम रेडियो संचालन तथा सामुदायिक खवर पत्रिका प्रकाशन गर्ने नीतिलाई अघि सारेको छ । फिल्म सुटिङ गर्नेले अनिबार्य अनुमति लिनुपर्ने निर्णय पारित गरेको छ ।

गाउँसभालाई सम्बोधन गर्दै एमाले सचिव एवं पूर्व पर्यटनमन्त्री पृथ्वीसुब्बा गुरुङले संविधानले प्रदान गरेको अधिकारमात्रै जनप्रतिनिधिले अवलम्बन गरे गाउँ तथा नगरपालिका समृद्ध बन्ने बताएका छन् । ‘स्थानीय तहलाई २१ वटा अधिकार प्रदान गरेको छ । आफ्नो गाउँको विकास आफैं बनाउन जनप्रतिनिधि सक्षम बन्नुपर्छ’ उनले भने । कार्यक्रममा कांग्रेस महाधिवेशन प्रतिनिधि गमप्रसाद गुरुङ, एमाले जिल्ला सचिव कृष्णप्रसाद अधिकारी लगायतले जनताको चाहनाअनुसार काम गर्न जनप्रतिनिधिलाई आग्रह गरे ।